नवीनसञ्चार सम्वाददाता
काठमाडौँ । काठमाडौँ महानगरपालिका र मानवसेवा आश्रमबीचसडकआश्रित मानवहरूको व्यवस्थापनका लागि एक करोड ५० लाख रुपैयाँको सहकार्य सम्झौता भएको छ। बुधबार महानगरपालिकाकी कार्यवाहक प्रमुख सुनिता डंगोल र मानवसेवा आश्रमका केन्द्रीय अध्यक्ष रामजी अधिकारीले सम्झौतापत्रमा हस्ताक्षर गर्नुभएको हो।
महानगरपालिकाको आर्थिक वर्ष २०८३/८४ को वार्षिक नीति, कार्यक्रम तथा बजेट पुस्तिकाको क्र.सं. ६४८ र खर्च संकेत नं. २६४१३ अन्तर्गत ‘सहयोगापेक्षी मानव व्यवस्थापनका लागि मानवसेवा आश्रमलाई घरभाडा, व्यवस्थापन तथा स्क्रिनिङ अनुदान’ कार्यक्रमका लागि उक्त रकम छुट्याइएको छ। विकास सहायता कार्यविधि, २०७९ को अनुसूची २ बमोजिम भएको सम्झौताअनुसार कार्यक्रम सञ्चालनमा मानवसेवा आश्रमले २० प्रतिशत लागत सहभागिता व्यहोर्नुपर्नेछ।
सम्झौतापछि आश्रमका केन्द्रीय अध्यक्ष रामजी अधिकारीले स्थापना कालदेखि नै महानगरपालिकाबाट सहयोग प्राप्त हुँदै आएको बताउनुभयो। सहयोगापेक्षी सडकआश्रित मानवमुक्त महानगर घोषणाको कार्यान्वयनका लागि महानगरपालिकाको अभिभावकत्वमा काठमाडौँ क्षेत्रमा रहेका सडकआश्रित मानवहरूको व्यवस्थापन गर्न आश्रम प्रतिबद्ध रहेको समेत उल्लेख गर्नुभयो।
महानगरपालिकाकी कार्यवाहक प्रमुख सुनिता डंगोलले संस्थागत रूपमा मानवसेवा आश्रमसँग सहकार्य गर्ने पहिलो स्थानीय सरकार काठमाडौँ महानगरपालिका रहेको बताउनुभयो। लामो समयदेखि हुँदै आएको सहकार्यलाई थप प्रभावकारी बनाउन सम्झौताले महत्त्वपूर्ण भूमिका खेल्ने विश्वास व्यक्त गर्दै उहाँले आश्रमसँग सहकार्य गर्न पाउँदा खुसी लागेको बताउनुभयो।
सम्झौताअनुसार प्राप्त हुने रकम काठमाडौँ क्षेत्रका सडक किनारा तथा सार्वजनिक स्थलमा घरबारविहीन अवस्थामा कष्टपूर्ण जीवन बिताइरहेका सहयोगापेक्षी सडकआश्रित मानवहरूको व्यवस्थापनसम्बन्धी कार्यक्रम सञ्चालनमा उपयोग गरिनेछ।
कार्यक्रममा मानवसेवा आश्रमका केन्द्रीय सदस्य तथा उपत्यका संयोजक हुमनाथ पौडेल, केन्द्रीय सदस्य सदिस पुन, काठमाडाैँ महानगरपालिका सामाजिक विकास विभाग प्रमुख समीक्षा निरौला, महाशाखा प्रमुख सन्तु श्रेष्ठलगायतको उपस्थिति रहेको थियो।
मानवसेवा आश्रमले विभिन्न कारणले सडकआश्रित हुन पुगेका सहयोगापेक्षी मानवहरूको उद्धार, उपचार, संरक्षण, पारिवारिक पुनर्मिलन तथा पुनर्स्थापनाका क्षेत्रमा सेवा सञ्चालन गर्दै आइरहेकाे छ।