लिस्बन, पोर्चुगल — वैध र स्थायी बसोबासको सपना लिएर पोर्चुगल पुगेका हजारौँ नेपाली नागरिक अहिले गम्भीर कानुनी तथा प्रशासनिक संकटमा परेका छन्। पोर्चुगलको आप्रवासन निकाय Agency for Integration, Migration and Asylum (AIMA) ले गरेको जाँचका क्रममा नेपालीहरूले पेश गरेका केही पुलिस क्लियरेंस (चारित्रिक प्रमाणपत्र) मा नक्कली स्टाम्प र हस्ताक्षर प्रयोग भएको फेला परेपछि अस्थायी बसोबास अनुमति (Temporary Resident Card – TRC) प्रक्रिया प्रभावित बनेको हो।
AIMA का अनुसार, नेपाल प्रहरीले जारी गरेका प्रमाणपत्रहरू वास्तविक भए पनि ती कागजातमा Portuguese Embassy in New Delhi को नाममा प्रयोग गरिएका स्टाम्प र हस्ताक्षर नक्कली रहेको पुष्टि भएको छ। यसका कारण करिब १,८०० देखि २,००० नेपालीहरूको TRC सम्बन्धी प्रक्रिया रोकिएको छ र उनीहरूको स्थिति अनिश्चित बनेको छ।
AIMA ले नक्कली कागजात प्रयोग गर्नु गम्भीर आप्रवासन अपराध भएको स्पष्ट पार्दै यस्ता सबै आवेदनहरू स्वतः रोकिएको जनाएको छ। प्रभावित व्यक्तिहरूलाई निश्चित समयसीमा भित्र देश छोड्न सूचना पठाइने र समयमै नछोडेमा डिपोर्टेसन प्रक्रिया अघि बढाइने चेतावनी समेत दिइएको छ।
यसबीच, Embassy of Nepal in Lisbon ले पोर्चुगल सरकारसँग समन्वय गर्दै प्रभावित नेपालीहरूको पक्षमा मानवीय आधारमा पुनः समीक्षा गर्न अनुरोध गरेको छ। दूतावासले नक्कली स्टाम्पको सट्टा वैध कागजात पेश गर्ने अवसर दिन आग्रह गरेको जनाएको छ।
घटनाले पोर्चुगलस्थित नेपाली समुदायमा ठूलो त्रास र अन्योल सिर्जना गरेको छ। रोजगारी र बसोबासको आशामा ठूलो खर्च गरेर आएका धेरै नेपालीहरू अहिले आफ्नो कानुनी हैसियत गुम्ने डरमा छन्।
कानुनी विज्ञहरूले प्रभावित व्यक्तिहरूलाई दूतावासमार्फत आफ्ना कागजात पुनः प्रमाणीकरण गर्न, AIMA बाट आउने सूचना अनुसार समयमै प्रतिक्रिया दिन र यदि एजेन्टमार्फत सेवा लिएको भए त्यससम्बन्धी उजुरी दर्ता गर्न सुझाव दिएका छन्।
सम्बन्धित समाचार
