बार्सिलोना, अशिम लोप्चन तामाङ
स्पेन गैरआवासीय नेपाली संघ (NRNA) स्पेनले बार्सिलोनामा आफ्नै सामुदायिक भवन ‘नेपाल घर’ (मन्दिर) निर्माण गर्ने उद्देश्यका साथ आयोजना गर्न लागेको ‘ऐतिहासिक स्पेन आध्यात्मिक महोत्सव’ को तयारीका सन्दर्भमा सोमबार एक भव्य पत्रकार सम्मेलन सम्पन्न गरेको छ।
कार्यक्रममा एनआरएनए स्पेनका प्रवक्ता रमेश खनालले एक विस्तृत कार्यपत्र प्रस्तुत गर्दै अभियानको सांगठनिक र आर्थिक मार्गचित्र सार्वजनिक गर्नुभयो। प्रवक्ता खनालले स्पेनमा बढ्दो नेपाली जनघनत्वलाई मध्यनजर गर्दै आफ्नै भवनको आवश्यकता अपरिहार्य भएको र यसका लागि संघले २ लाख १४ हजार यूरो संकलन गर्ने लक्ष्य राखेको जानकारी दिनुभयो। हाल संघसँग करिब ४० हजार यूरो मौज्दात रहेको र महोत्सवमार्फत बाँकी रकम जुटाउने योजना कार्यपत्रमा उल्लेख छ।
सामुदायिक ऐक्यबद्धता र ऐक्यबद्धता

पत्रकार सम्मेलनमा बोल्दै जनसम्पर्क मञ्च स्पेनका अध्यक्ष शिव उपाध्याय , एनआरएनएका पूर्व आईसीसी सदस्य दिनेश गिरी, र बागलुङ समाज स्पेनका अध्यक्ष अरुण घिमिरेले नेपाल घरको आवश्यकता र विगतमा गरिएका प्रयासहरूबारे प्रकाश पार्नुभयो। उहाँहरूले आफ्नो तर्फबाट थोरै भए पनि सहयोग गरेर यो महान् अभियानमा ‘इँटा थप्ने’ प्रतिबद्धता व्यक्त गर्दै समुदायका सबै पक्षलाई एकजुट हुन आह्वान गर्नुभयो।
पत्रकारका प्रश्न र नेतृत्वको जवाफ
कार्यपत्र प्रस्तुतिपछि भएको प्रश्न-उत्तर सत्रमा पत्रकारहरूले कार्यक्रमको प्रभावकारिता र आर्थिक संकलनको सुनिश्चितताबारे जिज्ञासा राखेका थिए। संवाददाता शिला पाण्डेले नेपालबाट सहयोग गर्न चाहने दाताहरूका लागि के विकल्प छ भनी प्रश्न राख्नुभएको थियो। त्यसैगरी, अनलाइनखबरका युरोप संयोजक वसन्त रानाभाटले आध्यात्मिक कार्यक्रममा भक्तजनहरूले बोलेको रकम (कबोल गरेको दान) समयमै उठ्न सक्ने वा नसक्ने विषयमा चासो व्यक्त गर्नुभएको थियो।
पत्रकारहरूका प्रश्नको चित्तबुझ्दो जवाफ दिँदै एनआरएनए स्पेनका अध्यक्ष सन्तोष श्रेष्ठले अब जुनसुकै हालतमा पनि ‘नेपाल घर’ बनाएरै छाड्ने दृढ संकल्प व्यक्त गर्नुभयो। उहाँले भन्नुभयो, “५ दिने महोत्सवका क्रममा संकलन हुने र बोलिने दान रकम उठाउन हामी पूर्ण रूपमा प्रतिबद्ध छौं। साथै, नेपालबाट सहयोग गर्न चाहनेहरूका लागि पनि रकम ल्याउने कानुनी र प्राविधिक विकल्पहरू तयार पारिएको छ।” अध्यक्ष श्रेष्ठले यसपटकको कार्यसमिति परिणाममुखी काम गर्ने अठोटका साथ अघि बढेको स्पष्ट पार्नुभयो।
व्यवस्थापन र सहभागिता
अध्यक्ष सन्तोष श्रेष्ठको अध्यक्षतामा सम्पन्न उक्त कार्यक्रममा स्थानीय सञ्चारकर्मीहरूको उत्साहजनक सहभागिता रहेको थियो। एनआरएनए स्पेनका महासचिव नवीन घिमिरेले सञ्चालन गर्नुभएको कार्यक्रममा सह-कोषाध्यक्ष सुमन खड्काले उपस्थित सबैलाई स्वागत मन्तव्यद्वारा स्वागत गर्नुभएको थियो।
आगामी अप्रिलमा हुने यस महोत्सवमा नेपालका प्रतिष्ठित वाचन पण्डित श्री दीनबन्धु पोखरेलले भागवत, वेद र बुद्ध दर्शनमा आधारित प्रवचन दिने कार्यक्रम रहेको छ। यो अभियान सफल भएमा स्पेनमा नेपाली समुदायको आफ्नै सांस्कृतिक र सामुदायिक केन्द्र स्थापना हुने निश्चित छ।