-नवीनसञ्चार सम्वाददाता
काठमाडौँ, १० माघ
स्टानफोर्ड मन्टेसरी टिचर्स ट्रेनिङ सेन्टर (एसएमटिसी) र लायन्स क्लब अफ डाइमण्ड सिटी ३२५ को संयुक्त आयोजनामा मन्टेसरी शिक्षक तालिम सफलतापूर्वक सम्पन्न भएको छ। एक समारोहबीच सहभागीलाई प्रमाणपत्र वितरण गरिएको छ । तालिमका एसएमटिसीका प्रमुख प्रशिक्षक राधिका खत्रीले सहभागीलाई पूर्व बाल्यावस्था शिक्षाका विविध विषयमा सैद्धान्तिक र प्रयोगात्मक प्रशिक्षण दिनुभएको थियो । समापन समारोहलाई सम्बोधन गर्दै प्रमुख प्रशिक्षक खत्रीले भन्नुभयो-‘ तपाईंहरूले अध्ययन अवधिभर देखाउनुभएको अनुशासन, लगनशीलता, सिकाइप्रतिको प्रतिबद्धता तथा सकारात्मक सोच अत्यन्तै प्रशंसनीय छ। कक्षाभित्र र बाहिर तपाईंहरूको सक्रिय सहभागिता, प्रश्न गर्ने बानी र व्यवहारिक अभ्यासले शिक्षण–सिकाइ प्रक्रियालाई अर्थपूर्ण बनायो।’ सो अवसरमा उहाँले सहभागीको उज्ज्वल भविष्य, पेशागत सफलता र समाजप्रतिको योगदानका लागि शुभकामना व्यक्त समेत गर्नुभएको थियो ।
सहभागीले तालिम अत्यन्त प्रभावकारी रहेको र यसले सक्षम, योग्य र दक्ष शिक्षक उत्पादन गरेको प्रतिक्रिया दिनुभएको थियो ।
एसएमटिसीले नेपालमा पूर्व वाल्यवस्था शिक्षाको विकासका लागि नियमित रुपमा शिक्षक तालिम सञ्चालन गर्दै आएको छ । सोल्टीमोड र जरखुमा रहेको वि.सं. २०७५ मा स्थापित एसएमटिसीले विभिन्न संघसंस्थाको सहकार्यमा निःशुल्क तालिम समेत सञ्चालन गर्दै आएको छ ।
