निषा पाण्डे
ह्यारिसबर्गमा त्रीवेणी साहित्यिक मञ्चले गत जुलाई २७ तारिक २०२५ मा
भव्य भानुजयन्ती सम्पन्न गरेको छ । प्रा . डा. हरिप्रसाद अधिकारीको प्रमुख आतिथ्यमा सम्पन्न गोष्ठीमा आदिकवि भानुभक्त आचार्यलाई विभिन्न विद्याका प्रस्तुतीबाट सम्झना गरिएको थियो । कार्यक्रममा अमेरिकाबाट भानुलाई पत्र पढेर र वक्तव्य मार्फत सुनाइएको थियो । यसरी पत्र सुनाउनेहरु डा . तुलाराम न्यौपाने , डा . बाशुदेव मिश्र र युवा कवि देविका बराल थिए । देविका बरालले ओहायो निवासी बाशु पोख्रेल द्वारा लिखित भानुलाई पत्र सुनाएकी थिइन । कार्यक्रममा बालन र सङ्गिनी गाइएको थियो । सङ्गिनी नृत्यमा बशुधा रिजाल , बेदमाया चम्लागाई , मिना आचार्य , देबिका पोख्रेल , भिमा गौतम , कमला पाठकको सहभागिता थियो । त्यस्तै बालनमा केशब धिमाल , डिल्ली अधिकारी ,देविचरण धिमाल लगायतको समूह थियो । सङ्गिनी र बालन नेपालीहरुको परम्परागत नृत्य भएकोले साहित्य मञ्चले त्यसको जगेर्ना गर्ने उद्देश्य राखेर कार्यक्रममा यी नृत्य समावेश गरेको थियो ।
कार्यक्रममा आदिकवि भानुभक्तको जीवनी साहित्यकार गण्डकीपुत्रले प्रस्तुत गरेका थिए भने स्वगत मन्तब्य मञ्चका सह -सचिव अबि अधिकारीले गरेका थिए । ल्याङ्गकास्टरका बाल प्रतिभाहरुको गीत र नृत्यले कार्यक्रममा रोचकता थपेको थियो भने गुरुङ सिस्टर डान्स क्लवका कलाकारले साँस्कृतिक नृत्य प्रस्तुत गरेका थिए । कविहरु त्रिबिक्रम न्यौपाने , निषा पाण्डे , केशव धिमाल लगायतले कविता वाचन गरेका थिए !
कार्यक्रममा भानुभक्त शीर्षकको नाटक मञ्चन गरिएको थियो । भानुभक्तको जीवनीको नाट्य रुपान्तरण र निर्देशन कवि साहित्यकार गण्डकीपुत्रले गरेका थिए भने भाषा सम्पादन तथा नाटक संयोजन त्रीवेणी साहित्यिक मञ्चका अध्यक्ष कवि केशब बैरागी माइलोले गरेका थिए । नाटकमा घाँसीको भुमिकामा अध्यक्ष बैरागी माइलाले निभाएका थिए भने भानुभक्तको भुमिकामा युवा कवि गोबिन्द अधिकारी थिए । नाटकमा गजाधर सोती र उनकी पत्नीको भुमिकामा लामो समय नाटकमा सङ्गसङ्गै अभिनय गर्दै आएका कलाकार द्वय प्रकाश नौबाग र रुपा दाहालले गरेका थिए । पथरी शरणार्थी शिविर देखिनै नाटकमा अभिनय गरेका प्रकाश नौबाग र रुपा दाहालको प्रस्तुती अत्यन्त सशक्त थियो । नाटकमा पृष्ठभूमिबाट बाँसुरी बादनमा साथ दिएका थिए फुर्वा तामाङले भने नाटककै बिषयबस्तुसङ्ग जोडिएको कविता सुनाएकी थिइन हिन्दुधर्म तथा साँस्कृतिक संगठनकि उपाध्यक्ष बशुधा रिजालले ।
प्रमुख अतिथी प्रा . डा . हरिप्रसाद अधिकारीले अमेरिका भ्रमणका क्रममा भानुजयन्तीका अबसरमा सहभागी हुनपाउँदा खुसी लागेको भन्दै नेपाली परम्पराका बालन , सङ्गिनी , गीत नृत्य र कविताका साथ नाटकको स्वाद लिन पाएकोमा गर्व लागेको बताएका थिए ।
कार्यक्रममा हिमालय ताइकान्दोकी संचालिका पुनम दुलालले भाषाको क्षेत्रमा सकृय सबै प्रती आफ्नो तर्फबाट सहयोग रहनेकुरा बताएकी थिइन । कार्यक्रममा बिशेष अतिथीका रुपमा साहित्यकार डि .बि सारु , समाजसेबी टि बि गुरुङ , समाजसेवी दिपकजङ्ग विश्वकर्मा , गायक , सङ्गीतकार अगम गुरुङ लगायतको उपस्थिती थियो । कार्यक्रमको सभापतित्व मञ्चका उपाध्यक्ष प्रेम घिमिरे र कार्यक्रम संचालन मञ्चका सचिव नारद “सुदामा” आचार्यले गरेका थिए भनी कार्यक्रमको सम्पुर्ण छायङ्कन प्रसान्ना आचार्यले गरेकी थिइन् ।
