नवीनसञ्चार सम्वादाता, काठमाडौँ ।
शान्तिनगरस्थित बानेश्वर बहुमुखी क्याम्पसले नयाँ बानेश्वरमा रहेको नेपाल बालसेवा फाउण्डेसनमा आश्रित अनाथ बालबालिकालाई शैक्षिक सामग्री तथा खेलकुद सामग्री सहयोग गरेको छ । सो अवसरमा व्यक्तिगत सरसफाई सम्बन्धी सचेतनामूलक जानकारी समेत दिइएको थियो । कार्यक्रममा क्याम्पस प्रमुख प्रा.डा. घमानसिंह खड्काले शिक्षालाई समाजसँग जोड्दै विद्यार्थीलाई सामाजिक हित तथा परिवर्तनका सम्वाहकका रुपमा विकास गर्न सामाग्री वितरण गरिएको बताउनुभयो । विद्याथीलाई समाजसँग जोड्ने र सामाजिक समस्या एवं विकृति विसङ्गति हटाई समाजिक परिवर्तनमा योगदान गर्न सिकाउने उद्देश्यले क्याम्पसले नियमित रुपमा समुदायमा गई विविध रचनात्मक कार्यक्रम सञ्चालन गर्दै आएको क्याम्पस प्रमुख प्रा.डा. खड्काले जानकारी दिनुभयो ।

विश्वविद्यालय अनुदान आयोगबाट क्युएएप्राप्त क्याम्पसले विद्यार्थीको प्रत्यक्ष सहभागितामा यस्ता रचनात्मक कार्यक्रम नियमित सञ्चालन गर्दै आएको प्रा.डा. खड्काको भनाई थियो ।
सोही अवसरमा क्याम्पसको स्नातक तहमा अध्ययरत विद्यार्थीले फाउण्डेसनमा रहेका अनाथ बालबालिकाको शैक्षिक, सामाजिक, मानसिक तथा स्वास्थ्य स्थिति र अनाथालयको अवस्थाका सम्बन्धमा अध्ययन समेत गरेका थिए । समारोहका क्याम्पसका विद्यार्थी, प्राध्यापक, फाउण्डेसनका पदाधिकारी र बालबालिकाको उत्साहजनक उपस्थिति रहेको थियो ।