नबिन सन्चार झापा
हल्दीबारी जेसीजद्वारा सञ्चालित ‘स्व. आरती राजवंशी स्मृति घर निर्माण अभियान’ का लागि अन्तर्राष्ट्रिय झापाली समाजले आर्थिक सहयोग प्रदान गरेको छ ।
समाजले उक्त मानवीय कार्यका लागि नगद ३० हजार रुपैयाँ सहयोग उपलब्ध गराएको हो । विगत केही समयदेखि हल्दीबारीमा विपन्न परिवारकी स्व. आरती राजवंशीको स्मृतिमा घर निर्माणको विशेष अभियान सञ्चालन भइरहेको छ ।
सोही अभियानलाई टेवा पुर्याउने उद्देश्यले अन्तर्राष्ट्रिय झापाली समाजले प्रदान गरेको सहयोग रकम हल्दीबारी जेसीजले एक कार्यक्रमका बीच ग्रहण गरेको जनाएको छ । आफ्नो स्थापनाको दोस्रो कार्यकालमै हल्दीबारी जेसीजले स्थानीय स्तरमा उदाहरणीय तथा मानवीय कार्यलाई प्राथमिकताका साथ अघि बढाउँदै आएको छ ।
विभिन्न संघ–संस्था तथा समाजसेवीहरूसँग समन्वय गर्दै सुरु गरिएको यस घर निर्माण अभियानले स्थानीय समाजमा आपसी सहयोग, सहकार्य र सामाजिक उत्तरदायित्वको सकारात्मक सन्देश प्रवाह गरेको जेसीज नेतृत्वले जनाएको छ ।
सहयोगदाता संस्था अन्तर्राष्ट्रिय झापाली समाजले लामो समयदेखि झापा जिल्लाभर विभिन्न सामाजिक तथा मानवीय क्षेत्रमा सक्रिय भूमिका निर्वाह गर्दै आएको छ । समाजले विपन्न विद्यार्थीहरूलाई छात्रवृत्ति वितरण, खेलकुद विकास, एम्बुलेन्स सेवा सञ्चालन तथा शववाहन व्यवस्थापनलगायतका परोपकारी कार्यमा निरन्तर सहयोग गर्दै आएको छ ।
आफ्नो महत्त्वपूर्ण मानवीय अभियानमा साथ र सहयोग प्रदान गरेको भन्दै हल्दीबारी जेसीजले अन्तर्राष्ट्रिय झापाली समाजका अध्यक्ष, सम्पूर्ण कार्यसमिति तथा सहयोगीहरूप्रति हार्दिक कृतज्ञता तथा धन्यवाद व्यक्त गरेको छ ।
