रियाद, साउदी अरब नबिन सन्चार – साउदी अरबमा कार्यरत नेपाली श्रमिकहरूको सुरक्षालाई ध्यानमा राख्दै सामाजिक सुरक्षा बीमा योजनासम्बन्धी जानकारी सार्वजनिक गरिएको छ। यस योजनालाई GOSI (General Organization of Social Insurance) भनिन्छ, जुन साउदी सरकारको सामाजिक सुरक्षासम्बन्धी निकाय हो।

GOSI अन्तर्गत वैदेशिक रोजगारीमा साउदी अरबमा कार्यरत श्रमिकहरू कार्यस्थलमा दुर्घटनामा परेमा वा ज्यान गुमाएमा सम्बन्धित हकवालाहरूलाई आर्थिक राहत प्रदान गरिन्छ।

GOSI के हो?

GOSI साउदी सरकारद्वारा सञ्चालित सामाजिक सुरक्षा बीमा हो, जसमा साउदी अरबमा वैधानिक रूपमा कार्यरत श्रमिकहरूलाई अनिवार्य रूपमा समावेश गरिन्छ। हरेक महिनाको तलब र आवास भत्ताको आधारमा २ प्रतिशत रकम बीमा प्रयोजनका लागि कट्टा गरिन्छ।

कति पाइन्छ बीमा रकम?

कार्यस्थलमा दुर्घटनामा मृत्यु भएमा मृतक श्रमिकका हकवालाहरूलाई अधिकतम ८४ महिनाको तलब बराबरको रकम अर्थात् ३,३०,००० साउदी रियालसम्म प्राप्त हुन सक्छ। यदि श्रमिक अपाङ्ग भएका छन् भने अपाङ्गताको प्रतिशतअनुसार अधिकतम ६० महिनाको तलब बराबरको रकम अर्थात् १,६५,००० रियालसम्म प्राप्त गर्न सकिन्छ।

हकदार को–को हुन?

मृतकको श्रीमती, श्रीमान, छोराछोरी, बा–आमा, दाजुभाइ, दिदीबहिनी, हजुरबा–हजुरआमा, नातिनातिनी (यदि उनीहरू आश्रित छन् वा अविवाहित छन्) हकदार मानिन्छन्।

बीमा दावी गर्न आवश्यक कागजातहरू

दावी गर्न मृतकका हकवालाहरूले GOSI फारम, नाता प्रमाणित कागजातहरू, मृतकको नागरिकता र मृत्यु प्रमाणपत्र, बैक खाता विवरण (SWIFT कोडसहित), तथा अन्य आवश्यक कागजातहरू बुझाउनुपर्ने हुन्छ। सबै कागजातहरू अंग्रेजी भाषामा अनुवाद गरी नोटरी पब्लिकबाट प्रमाणित गरिनुपर्नेछ।

कागजात पठाउने प्रक्रिया

तयार पारिएका कागजातहरू सिधै GOSI को इमेल compensation_ri@gosi.gov.sa मा पठाउन सकिनेछ। साथै, नेपाली दूतावासले फलोअप गर्न सक्ने गरी gosiksa@mofa.gov.np मा BCC गर्न अनुरोध गरिएको छ।

इमेलमार्फत पठाउन नसक्ने अवस्थामा भने नेपाल सरकारको परराष्ट्र मन्त्रालय, कन्सुलर सेवा विभागमार्फत राजदूतावासमा कागजात पठाउन सकिनेछ।

सम्पर्क

यस सम्बन्धमा थप जानकारी तथा सहयोगका लागि नेपाली राजदूतावास, रियाद वा महावाणिज्यदूतावास जेद्धा मा सम्पर्क गर्न सकिनेछ।