काठमाडौँ । एभरेष्ट बैंक लिमिटेडले जनकपुरको मुरली चोकमा शुक्रबार १२७ औँ शाखा उद्घाटन गरेको छ ।
जनकपुर उप–महानगरपालिका वडा नं. ४ का वडा अध्यक्ष सुरेश झा र बैंकका नायब प्रमुख कार्यकारी अधिकृत विजय कुमार शर्माले संयुक्त रुपमा शाखाको उद्घाटन गर्नुभएको हो । उद्घाटन समारोहमा बैंकका मधेश प्रदेश प्रादेशिक–प्रबन्धक विभूती न्यौपाने लगायतको उपस्थिति रहेको थियो ।
उद्घाटन समारोहलाई सम्बोधन गर्दै अध्यक्ष झाले जनकपुर क्षेत्रमा दोस्रो शाखाको रुपमा मुरली चोकमा बैंकको आगमनले सर्वसाधरणको वित्तीय पहुँच अझ सहज तथा सुलभ हुने बताउनु भयो । बैंकका नायब प्रमुख कार्यकारी अधिकृत शर्माले मुरली चोक र जनकपुर आसपासका बासिन्दालाई अत्याधुनिक तथा गुणस्तरीय बैंकिङ्ग सेवा प्रदान गराउने प्रतिवद्धता व्यक्त गर्नुका साथै पञ्जाब नेशनल बैंक भारतसँगको साझेदारीले स्थानिय बासिन्दालाई रेमिटान्स र अन्य बैंकिङ्ग सेवा तथा सुविधा उपभोग गर्न अझ सहज हुने विश्वास व्यक्त गर्नुभयो । योसंगै मधेश प्रदेशमा बैंकको शाखा संख्या १४ पुगेको छ । देशका विभिन्न गाउँ तथा शहरमा रहेका ग्राहकलाई अत्याधुनिक, दिगो, दरिलो र विश्वासिलो बैंकिङ्ग सेवा र सुबिधाहरु उपलब्ध गराउने उद्देश्यका साथ सो शाखा स्थापना गरिएको बैंकले जनाएको छ ।
बैंकमा हालसम्म करिब १३ लाख भन्दा बढी ग्राहक रहेका छन् । १२७ शाखा सञ्जाल, ३ एक्सटेन्सन काउण्टर, ७ प्रादेशिक कार्यालय, १६२ एटिएमसहित विश्वव्यापी नेटवर्कबाट अत्याधुनिक मोबाइल, इन्टरनेट र एसएमएस बैकिङ्ग सुबिधा प्रदान गर्दै आइरहेको छ । बैंकले नेपाल सरकारको राजस्व संकलनको लागि ३२ वटा संकलन केन्द्रबाट समेत सेवा दिँदै आइरहेको जनाएको छ ।
